Statusi i Qendrës Shqiptare për Integrim, Kulturë dhe Religjion në Lozanë (CICRA)

1. EMRI DHE SELIA

1.1 Nën emrin Qendra Shqiptare për Integrim, Kulturë dhe Religjion në Lozanë (CICRA) ekziston një shoqatë, politikisht neutrale dhe jofitimprurëse, sipas nenit 60 ff të Kodit Civil Zviceran. Në kuadër të saj funksionon edhe xhamia.

1.2 Selia e CICRA-s është në adresën:
Chemin du Couchant 4, 1022 Chavannes-près-Renens, Kanton Vaud.

1.3 Qendra përbëhet nga anëtarë të etnikumit shqiptar dhe të etnikumeve të tjera që pajtohen me këtë Statut dhe që jetojnë kryesisht në Lozanë dhe rrethinë.

---

2. SYNIMET

2.1 Kultivimi i vlerave të mirëfillta të identitetit kombëtar dhe fetar, në funksion të ruajtjes nga asimilimi.

2.2 Vendosja dhe promovimi i marrëdhënieve të dashamirësisë dhe ndershmërisë me qytetarët e Zvicrës.

2.3 Promovimi i marrëdhënieve korrekte, respektit dhe tolerancës ndërmjet myslimanëve dhe religjioneve të tjera.

2.4 Ngritja e urave të komunikimit dhe bashkëpunimit mes komunitetit tonë dhe komuniteteve të tjera, veçanërisht me institucionet zyrtare zvicerane.

2.5 Vendosja e një politike të qartë për marrëdhënie korrekte me autoritetet lokale.

2.6 Përforcimi i marrëdhënieve mes familjeve shqiptare.

2.7 Organizimi i aktiviteteve fetare, kulturore, kombëtare, rekreative dhe sportive.

2.8 Ofrimi i mundësisë së mësimit dhe praktikimit të Islamit brenda dhe, sipas mundësive, edhe jashtë hapësirave të Qendrës.

2.9 Krijimi i një platforme kulturore dhe fetare islame–shqiptare për anëtarët dhe të interesuarit e tjerë.

2.10 Përfaqësimi i qartë i Islamit të mesëm, duke krijuar një ambient të shëndoshë për dialog dhe këmbim mendimesh.

2.11 Ruajtja dhe avancimi i interesave të anëtarëve në territorin ku vepron Qendra.

2.12 Veprimtaria mbështetet në burimet autentike të Islamit, në Kushtetutën dhe ligjet e Zvicrës, në Deklaratën e të Drejtave të Njeriut dhe në këtë Statut.

2.13 Ekstremizmi dhe/ose fanatizmi në çfarëdo forme nuk tolerohen dhe nuk mbështeten nga CICRA.

2.14 Angazhim për bashkëpunim të ngushtë me shoqata, xhami dhe komunitete të tjera, si dhe me organizata islame apo kombëtare në Zvicër.

2.15 CICRA angazhohet për integrimin e anëtarëve në shoqërinë zvicerane dhe vepron në kuadër të Komunitetit Musliman Shqiptar të Zvicrës (KMShZ / DAIGS).

2.16 CICRA është anëtare e organizatave islame në nivel komunal, kantonal dhe federal që ndajnë të njëjtat synime dhe parime.

2.17 CICRA angazhohet për dialogun ndërfetar dhe për ruajtjen e paqes shoqërore.

2.18 CICRA është themeluar për një afat kohor të pacaktuar.

2.19 CICRA vepron në mënyrë të pavarur dhe nuk guxon të bjerë ndesh me synimet e saj apo parimet e Islamit.

2.20 CICRA ruan marrëdhënie shpirtërore me Bashkësitë Islame të Kosovës, Maqedonisë së Veriut, Shqipërisë dhe Luginës së Preshevës.

---

3. MJETET FINANCIARE

3.1 CICRA është e pavarur financiarisht.

3.2 Financimi sigurohet përmes:

• kontributeve vjetore të anëtarësisë;

• subvencioneve të mundshme;

• dhuratave të pakushtëzuara;

• trashëgimive dhe testamentëve;

• kontributeve të dashamirëve dhe afaristëve;

• të ardhurave nga aktivitete dhe manifestime.

3.3 CICRA nuk pranon donacione nga persona ose organizata të dyshimta.

---

4. ANËTARËT DHE ANËTARËSIA

4.1 Anëtarë të CICRA-s janë personat që pranojnë këtë statut dhe zotohen ta respektojnë atë.

4.2 CICRA njeh:
a) anëtarë të rregullt;
b) anëtarë nderi.

4.3 Anëtarësimi kërkohet me shkrim dhe miratohet nga Kryesia.

---

5. KONTRIBUTET E ANËTARËSISË

5.1 Shuma e anëtarësisë caktohet nga Kuvendi i CICRA-s.

5.2 Pagesa kryhet brenda tremujorit të parë të vitit kalendarik, me mundësi pagese me këste.

---

6. DALJA, PËRJASHTIMI DHE DORËHEQJA

6.1 Anëtarësimi përfundon në rast dorëheqjeje me shkrim ose përjashtimi nga Kuvendi për shkelje të statutit, mospagesë ose veprim kundër interesave të Qendrës.

6.2 Anëtarët që largohen ose përjashtohen nuk kanë të drejtë mbi pasurinë e CICRA-s.

6.3 Organet udhëheqëse kanë të drejtë t’i drejtohen autoriteteve për respektimin e vendimeve të tyre.

---

7. ORGANIZIMI

Organet e CICRA-s janë:

• Kuvendi

• Kryesia

• Revizorët

---

8. KUVENDI

8.1 Kuvendi është organi më i lartë i CICRA-s dhe mblidhet të paktën një herë në vit.

8.2 Kuvendi vendos për statutin, zgjedhjet, buxhetin, projektet, anëtarësinë dhe çështje të tjera themelore.

8.3 Vendimet merren me shumicë absolute.

8.4 Kuorumi është 30% e anëtarëve; në mungesë, Kuvendi thirret sërish dhe merr vendime edhe me më pak pjesëmarrje.

8.5 Gjuha e punës është shqipja, sipas nevojës edhe gjuhët zyrtare të Zvicrës.

8.6 Ftesa dhe rendi i ditës publikohen së paku dy javë përpara.

---

9. KRYESIA

9.1 Kryesia përbëhet nga së paku shtatë anëtarë dhe zgjidhet për mandat katërvjeçar.

9.2 Kryesia përfaqëson CICRA-n, zbaton vendimet e Kuvendit, menaxhon financat dhe pasurinë, dhe siguron funksionimin e rregullt të Qendrës.

9.3 Anëtarët e Kryesisë punojnë pa pagesë; u kompensohen vetëm shpenzimet zyrtare.

---

10. REVIZORËT

10.1 Revizorët zgjidhen nga Kuvendi për një mandat katërvjeçar dhe mbikëqyrin punën financiare dhe administrative të CICRA-s.